اللـوغـــاريـتــم

صـرح السيد المهندس / أحمد المغربي وزير الأسكان عقب تشكيل الحكومة الثانية

للدكتور / أحمد نظيف في ديسمبر 2005 بأن الحكومة بصدد تنفيذ مشروع للشباب

تحت رعاية السيد رئيس الجمهورية و بتوجيهات منة طبعا الي اخر الديباجة اللي أنتوا عارفينها

مضمونها انهم لاحظوا اخيرا ان سن الجواز اتاخر لية للشباب و الشبات في مصر المحروسة

علشان اية بقي ؟ الشقق و البيوت غالية علي العيال فبالتالي سن الجواز بقي قرب علي سن العنوسة سواء للراجل او للبنت فمشكورين تبنوا موضوع او مشروع أسمة

ابـــنـــي بــيــتـــك

تابعت انا الموضوع و اندهشت و استغربت و برغم من اني مهندس من زمان واللوغاريتمات دي لعبتي معرفتش احل هذا اللوغاريتم و هو: شرط يكاد يكون من وضعة عبقري من عباقرة الحكومة الي مالهوش دعوة و لا يعرف حاجة عن الشباب او ظروفهم او دخلياتهم او هما بيطفحوا الدم طول الشهر علشان اخر الشهر يقبضوا كام ملطوش

الا يزيد دخل المواطن الاعزب علي 1000 جنية و لا يزيد الايراد الشهري للاسرة علي 1500 جنية

سؤال : هل ممكن ان يكون هناك شاب متوسط الدخل او من الكادحين و دخلة الف جنية من اساسة ( هي الناس دي موش عايشة معانا و لا اية ؟ و موش عارفة اباطرة مجلس الشعب من رجال الاعمال بيدوا مرتبات كام او حتي القطاعات الحكومية الي فاضلة و لسة ما اتباعتش بيقبضوا كام ؟) و لو افترضنا ان فية شاب بيقبض الف جنية شهريا ازاي يدفع مائة الف جنية ثمن الارض و يبني عليها فيلا

عجبتني قوي مشروع بناء الفيلا دي للشباب و محدودي الدخل ...يعني علشان ما تقولوش انهم حرمين شبابنا من حاجة ... حيسكنوا الشباب في فيلات اهم موش شقق ..... يعني هو عريان الي اسمها اية دي .... و يحب التقميص و يقول باب الخمارة فين ..؟

و الله الناس دي يا من كوكب تاني ... يا بيستعبطوا .. او بيستهبلوا ...او بقي عاملين تخصيص الارض و المشروع لناس تانية خالص غير شباب البلد

و يبقي و لا مدينتي مدينة عصرية او كومبوند من اللي موجودين في مدينة 6 اكتوبر

يعني بمعني اصح يسلموا الشباب الارض و يرجعوا يلموها تاني لصالح بعض من رجال الاعمال زي ما عملوا في الاراضي الزراعية المسلمة لشباب الخريجين و اشتراها منهم اباطرة تصدير الحاصلات الزراعية لتزيد من ثرواتهم و كفاية علي العيال تعريقهم في تمن الارض بباكو و لا اتنين يعني هما لاقين.. يبوسوا اديهم وش و ظهر