لصالح من ؟ مين المستفيد ؟ الله يحرقكم يا بعدااا

الخميس 11 يناير

استيقظ الصبح بدري علي غير العادة ... علي البية واقف فوق ظهري بيلعب في قفايا البخت ... ياي ( اصلة لسة مابيتكلمش و ما بيعرفش يقول ياسر فممشيها ياي ...) بابا ما ( عيني مياة ) معلش اصل عليتنا كلها العربي بتاعها بليغ زي العربي بتاعي كدة ... حيث ان مراتي عندها ميتنج بدري فنزلت و سابتنا لسة نايمين ... قمت باعمال الام الصباحية كلها و لبست البلوة الصغنون ورغيت شوية مع فارس و انا بشرب القهوة الصباحية علشان اعرف افوق و انزل وديتة الحضانة و قلت بدل ما ارجع البيت ... اطلع بقي علي الشركة عندي ... و اهو يوم يوشوفوني من نفسهم بدري ... طبعا وصلت قبل الفراشين انفسهم ... ما علينا ما اطولش عليكم لا تناموا مني

مالقيتش حاجة اعملها غير اني و لاول مرة من مدة طويلة( يعلمها فارس قديم اني حالف علي الجرايد) ...

مسكت الاول : الاهرام و تصفحتة ..قرفت رميتة

مسكت التاني : الاخبار و تصفحتة دة كان عاوز يتحرق بغض النظر ان الجوز فاضين كلها مواضيع ... تبداء بحرف التاء(ت ) و ... تنتهي بحرف الصاض(ص) ما علينا الا انة لفت نظري لشيء واحد في الهبابين

و هو صفحة كاملة عن الشركة الجديدة للموبيل المحمول ذو الكمرتين الي تشوف فية الي بيكلمك و انت بتحدثة ... موش عاوز اقلكم ثمن هذا الجهاز بيبداء من كام ... كل الي عاوز اقولهولكم اني عارف اني مراتي حتكون اول واحد حشترتة في الاسكندرية و حتجيب نسختين علشان تشوفني انا فين صوت و صورة ... مسألة ثــقـــة يعني لا اكتر و لا اقل..أوعي حد يفتكر انها يعني بتشك فيا بس هي ساعات كدة بتحب تشوف طلعتي البهية و تتاكد انا فين !!!حد قاعد علي رجلي و لا قاعد انا علي المكتب ...في المكتب و لا في المصنع تحت ... في ميتنج و لا عند انجلو كدة يعني المهم الي لفت نظري في الموضوع ... هو لسة فية حد في مصر مامعهوش موبيل او كارت حتي بلاش خط علشان تتفتح شركة تالتة ... دة احنا بقي و لا بيفري هيلز ... طيب بدل ما نخش في تفاهات و مناقشات ننفخ بعض بيها

الموضوع بقي : اني افتكرت ان موبينيل كانت بتقول انها عندها 9 مليون مشترك بس ( ولاد الكذابة ) و فودافون بتقول عندها 8 مليون مشترك بس ...ولاد ستين كدابة انا اعلم من مراتي و هي تعمل مديرة بفودافون انهم عدوا ال 15 مليون ال 8 مليون دول الخطوط موش الخط و الكارت

ما علينا... لو افترضنا ان كلامهم صح يعني مصر بها 9+8=17 مليون خط و كارت مع بعض للشركتين نمشيها كدة جمايل

طيب 17 مليون خط *50 جنية بس متوسط الاشتراكات و الشخن و كدة = 850 مليون جنية شهري بتتسحب من السوق و جيوب الشعب ...ما بتروحش بقي للحكومة

لا بتروح للشركتين... 850 مليون شهريا دة علي اضيق الحدود و كدة احنا كرمينهم في النصف باليمت

يعني 850 مليون شهريا بتروح في الو ... هاي ... انتي فين ... جوزك نزل اجي و لا لسة ... تعالي خدني بقي يا بيبي طوب الارض واقف بالعربية يعاكسني و ( هي تلاقيها بايرة بنت بايرة الفار يطلع من بيتهم يسب الف دين و ملة من ريحتهم...) و فية ناس بتستخدمة في عملها صح دكاترة مهندسين تجار ظرف طاريء بس موش هو دة الموضوع

السؤال بقي : مين ابن ستين كلب ابن سيدة مستحمتش الي وافق علي بيع شركة الاتصالات الولي في مصر من الهيئة الي موبينيل

و لصالح من و باعها بكام ابن ال..... مستحمتش دي و قبض فيها كام ... و نصص بقي مع مين ... يعني ابيع شركة بمليار و هي بتجيب تمنها في 3 شهور ... يانهار ابوكم اسود مخطط بحكلي علي خلفية بلو بلاك ... و الله حرام ... دة كل الي الشركة عملتة هو شوية مقرات نظيفة علي شوية بنات و صبيان من بتوع هاي و نادي الجزيرة و نادي سبورتنج علي كام عربية ايجار علي كام معرض بالتنسيق طبعا مع محترف سياسة بيع زي سياسة مديرها السابق عثمان سلطان اكلت ام البلد كلها من اسوان لبورسعيد ...طيب كنتوا خليتوها و اسرقوا الي تسرقوة منها كانت برضة حترمي في حزانة الدولة النصف ما كانتش حتخسر ....وكنتوا اكلتوا الغلابة و عالجتوهم بدل ما كل حاجة بقي اعلان بالتليفزيون و الفضائيات اتبرع و لو بجنية ..( انا موش ضدد التبرع بس بالصورة الي بيعملوها دي, دة اسمة تسول ) اشيء طفل الصعيد... اشي مستشفي 57357فية مستشفي اسمها 57357 يا ولاد ال........ حرام عليكم العيل الي يخشها تجيبولة اكتاب مع مرضة... نفسي حد فيكم يكون بيعرف يفك هيلوغريمات تصرفات المسؤلين و قرارتهم مع طبعا المعلمة الكبيرة الحكومة ) .... و يفهمني هي اتباعت لية و لصالح من غير ملاك موبينيل

دة غير بقي لعبة فودافون المشهورة بتاعت رجل الاعمال الي كان مؤسسها و بعدين باعها لفودافون العالمية سيبوكوا من دي...الهبابة بتاعت الهيئة دي تتباع ازاي ... اهو دي الي فعلا تقفيصة فراخ بتبيض بيض ذهب يوميا ... و لا احنا وصل بينا الحال بمؤسساتنا انها ما تقدرش حتي تدور شركة تليفونات طب كنتوا بيعتوا نصفها و لا حتي كنتوا خليتوا شركة زي موبينيل تدورهالكم بنسبة بما انكم حمير .... طب كنتم خليتوها اهي برضة كنتم حتعرفوا تخلوا الي بالي بالكم يعرف يتصنت علي تليفوناتنا بسهولة من غير ما يشتروا اجهزة اعتراض و شوشرة علي تليفونات الناس

حسبي الله و نعم الوكيل فيكم و معاكي ربنا يا بلد